Монгол Улсын Үндэсний агаарын тээвэрлэгч МИАТ ТӨХК нь Олон улсын агаарын тээврийн холбооны "IATA" Газрын үйл ажиллагааны аюулгүй байдлын аудит ISAGO (IATA Safety Audit for Ground Operations)-д 99.8 хувийн үнэлгээ авч, олон улсын шаардлагыг тогтвортой хангаж байгаагаа дахин нотоллоо.

Тус холбооны зүгээс газрын үйлчилгээний салбарт баримталж буй стандартчилал, эрсдэлд суурилсан хяналт, нэгтгэсэн аудитын бодлоготой уялдуулсан ISAGO шинэ аргачлалыг 2025 оны зургаадугаар сараас хэрэгжүүлж эхэлсэн бөгөөд энэ нь IATA Ground Operations Manual (IGOM), IATA Cargo Handling Manual (ICHM), IATA Airport Handling Manual (AHM)-д бүрэн суурилсан, баримт бичгийн бүрдэл төдийгүй бодит хэрэгжилтийг  үнэлснээрээ онцлог болсон билээ.

МИАТ ТӨХК-ийн Гүйцэтгэх захирал Т.Тэлмэн энэ талаар хэлэхдээ “Олон улсын хараат бус, мэргэшсэн аудиторуудын шалгуураар 99.8 хувийн үнэлгээ авсан нь зүгээр нэг тоо бус. Энэ бол манай хамт олны сахилга бат, мэргэжлийн ур чадвар, аюулгүй байдлыг нэн тэргүүнд эрхэмлэж ирсний бодит илэрхийлэл юм. Бид зорчигчдынхоо амь нас, аюулгүй байдлыг хамгийн эхэнд тавьж, Монгол Улсын агаарын тээврийн салбарын нэр хүндийг олон улсад өндөрт өргөж чадсандаа бахархаж байна” хэмээн онцолсон юм.

ISAGO нь олон улсын хэмжээнд газрын үйл ажиллагааны аюулгүй байдлыг үнэлдэг өндөр шалгууртай, хараат бус аудитын хөтөлбөр бөгөөд биднийг олон улсын шилдэг практик, стандартуудыг бүрэн нэвтрүүлсэн болохыг 1240 стандартын хүрээнд: 

• Аюулгүй байдал, удирдлагын тогтолцоо (Management and Safety)
• Ажилтнуудын ур чадвар, сургалтын тогтолцоо (Training)
• Зорчигч үйлчилгээ (Passenger Handling)
• Тээшний үйлчилгээ (Baggage Handling)
• Ачаалалт хяналт (Load Control)
• Талбайн үйлчилгээний аюулгүй байдал (Ramp safety)
• Ачаа, шуудангийн үйлчилгээ (Cargo & Mail Handling) гэсэн үндсэн чиглэлүүдээр баталгаажуулсан юм.

   ISAGO гэрчилгээг дэлхийн хэмжээний томоохон газрын үйлчилгээний байгууллагууд болон үндэсний агаарын тээвэрлэгчид эзэмшдэг. Тухайлбал,  dnata (Emirates Group), Swissport, Menzies Aviation, Lufthansa Group-ийн газрын үйлчилгээний нэгжүүд, мөн Qantas, Singapore Airlines, ANA, Air Canada зэрэг агаарын тээвэрлэгчидтэй хамтран ажилладаг газрын үйлчилгээний байгууллагууд энэхүү аудитын шаардлагыг ханган ажиллаж байна.

"МИАТ" ТӨХК нь эдгээр байгууллагуудтай нэг түвшинд ISAGO-оор гэрчилгээжсэнээр газрын үйл ажиллагааны өрсөлдөх чадвараа бэхжүүлж, гадаад дотоодын агаарын тээвэрлэгчид, түнш байгууллагуудад найдвартай, стандартын дагуу, аюулгүй үйл ажиллагааг тогтвортой хангадаг болохоо бататган харууллаа.

      Үндэсний тэргүүлэгч МИАТ ТӨХК нь цаашид ч аюулгүй ажиллагаа, үйлчилгээний чанарыг дэлхийн стандартад нийцүүлэн тасралтгүй сайжруулж, зорчигч бүрдээ тав тухтай, найдвартай аяллыг бэлэглэхийг зорин ажиллаж байна.