Увс аймгийн Тэс суманд малын гоц халдварт, хүн, малын хамтын эмгэг болох боом өвчний хүний өвчлөлийн тохиолдол батлагдаж, голомтын бүсэд хариу арга хэмжээг шуурхай авч эхэллээ.
Халдвар авсан иргэн одоогоор Увс аймгийн Нэгдсэн эмнэлгийн Халдвартын тасагт тусгаарлагдан эмчлүүлж байгаа аж. Тархвар судлалын тандалт, судалгаагаар тухайн иргэн 2026 оны зургадугаар сарын 15-ны өдөр үхсэн хонийг, устгах үедээ халдвар авсан байх магадлалтайг холбогдох албаныхан тодотгож буй. Улмаар өвчний шинж тэмдэг илэрч, эмнэлгийн байгууллагад хандсаны дагуу 2026 оны зургадугаар сарын 21-ний өдөр Увс аймгийн Зоонозын өвчин судлалын төвд молекул биологийн PCR шинжилгээ хийхэд хариу нь “эерэг” гарч, халдвар албан ёсоор батлагджээ.
Одоогийн байдлаар өвчлөл бүртгэгдсэн голомтын бүсэд тус аймгийн Зооноз өвчин судлалын төв болон Мал эмнэлгийн байгууллагын хамтарсан баг шуурхай ажиллаж байгаа юм. Боом нь ихэвчлэн өвчилсөн болон үхсэн мал, амьтны мах, арьс, шир, ноос, яс, бууц зэрэг эдтэй харьцах үед дамждаг. Хүн халдвар авахдаа арьсаар болон амьсгалын замаар авдаг аж. Мөн өвчтэй малын түүхий эсвэл дутуу болгосон мах, сүүг хэрэглэхэд энэ өвчлөлөөр өвддөг аж.  Боомын үүсгэгч нян нь гадна орчинд маш тэсвэртэй "спор" хэлбэрт шилждэг. Энэ нь газрын хөрсөнд 30 жил хүртэл амьдрах чадвартай байдаг тул боомын үхсэн малын сэг зэмийг задлах, газрын хөрсийг хөндөх нь маш аюултай юм.