Үндэсний их баяр наадмын өдрүүдээр орон нутаг рүү зорчих хөдөлгөөн эрс нэмэгдэж, үүнийг дагасан зам тээврийн осол, ахуйн гэмтэл болон мориноос унах тохиолдол олширчээ. Энэ хугацаанд Гэмтэл согог судлалын үндэсний төв (ГССҮТ) болон салбар эмнэлгүүд өндөржүүлсэн бэлэн байдалд ажилласан байна.

Голлох тоон үзүүлэлтүүд (Долдугаар сарын 10–19)
Нийт үйлчлүүлэгч: 5,314 хүн яаралтай тусламж авсны 3,302 нь насанд хүрэгчид, 2,012 нь 0-18 насны хүүхдүүд байжээ.

Гэмтлийн шалтгаан: Нийт тохиолдлын 38.2 хувь буюу 2,031 нь уналтын улмаас бэртсэн нь хамгийн өндөр хувийг эзэлж байна. Мөн яаралтай тусламж авсан иргэдийн 10 хувь буюу 530 нь согтууруулах ундаа хэрэглэсэн үедээ гэмтжээ.

Мэс заслын тусламж: Эмнэлгийн баг нийт 170 яаралтай, 123 төлөвлөгөөт мэс засал амжилттай хийсэн байна. Түүнчлэн Хөвсгөл аймагт ажилласан алсын дуудлагын баг осолдсон иргэдэд газар дээр нь мэс заслын тусламж үзүүлж, хүнд өвчтөнүүдийг Улаанбаатар руу шуурхай тээвэрлэжээ.

Осол ба хүүхдийн аюулгүй байдал
Зам тээврийн осол: 943 хүн (үүнээс 367 хүүхэд) эмнэлгийн тусламж авчээ.

Мориноос унасан нь: Нийт 182 хүн мориноос унаж гэмтсэний 79 нь хүүхэд байсан бөгөөд үүний 23 нь уралдааны мориноос унаж бэртсэн байна.

Ахуйн осол: Гэр ахуйн орчинд 1,565 хүн гэмтсэний 615 нь хүүхэд байгаа нь эцэг эх, асран хамгаалагчдын хараа хяналтыг сайжруулах зайлшгүй шаардлагатайг харуулж байна.

Баярын өдрүүдэд иргэдийн эрүүл мэнд, амь насыг аврахын төлөө эмч, эмнэлгийн ажилтнууд цаг наргүй, тасралтгүй ажиллалаа. Иймд баяр наадмын амруудаар иргэд та бүхэн замын хөдөлгөөний аюулгүй байдлыг хангаж, хүүхдийн хараа хяналтаа сайжруулан, согтууруулах ундаа хэрэглэсэн үедээ тээврийн хэрэгсэл жолоодохгүй байхыг анхааруулж байна.