Өнгөрсөн шөнө цас орсоны улмаас авто замд халтиргаа гулгаа үүсэж, зам тээврийн осол гарч байгаа талаар Тээврийн цагдаагийн албанаас мэдээллээ.

Энэ талаар Тээврийн цагдаагийн албаны хошууч Г.Отгонтамир “Цасны улмаас 07:00-10:00 цагийн хооронд 200 гаруй зам тээврийн осол бүртгэгдээд байна. Ослын шалтгааны дийлэнх нь жолооч нар өвлийн дугуйгаа солиогүйгээс болж байна. Зарим жолооч нар дөрвөн улирлын дугуйтай учраас өвлийн дугуй авах шаардлагагүй гэж үздэг. Гэвч манай орны цаг агаар, замын нөхцөлд дөрвөн улирлын дугуй тохиромжгүй. Өнгөрсөн шөнө ихэнх аймагт цас орсон байна. Иймд холын замд, ялангуяа даваа гүвээгээр зорчих гэж байгаа жолооч нар өвлийн дугуйгаа сольж, замын хөдөлгөөнд анхаарал болгоомжтой оролцохыг уриалж байна” гэлээ.