Өнгөрсөн лхагва гарагт Венесуэлийн хойд хэсэгт 100 гаруй жилийн хамгийн хүчтэй газар хөдлөлт болсон. 7,2 баллын газарт хөдлөлт болсноос хойш ердөө 39 секундын дараа 7,5 балаар хоёр дахь чичиргээ болжээ. Тус улсын нийслэл Каракасаас 170 орчим км зайд байх Морон хотын орчим газар хөдлөлтийн голомт байжээ. Энэхүү газар хөдлөлт нь 1900 оноос хойшхи хамгийн хүчтэй газар хөдлөлт юм байна. Одоогоор 188 хүн нас барсан бөгөөд олон хүн сураггүй алга болжээ. Венесуэлийн хойд хэсэг нь Карибын хавтан болон Өмнөд Америкийн хавтан хоорондын идэвхтэй зааг дээр байрладаг. Эдгээр хоёр аварга тектоникийн хавтан жилд ойролцоогоор 2 см орчим харилцан шилжин хөдөлдөг. Хагарлын дагуу чулуулгууд удаан хугацаанд "түгжигдэж", хүчдэл хуримтлуулдаг аж. Хүчдэл гэнэт сулрахад газар хөдөлдөг. 
Хоёр удаа болсон иймм үзэгдлийг "давхар үндсэн газар хөдлөлт" гэдэг бөгөөд дэлхий дээр маш ховор тохиолддог. Ихэнхдээ хүчтэй газар хөдлөлтийн дараа жижиг дараах чичиргээнүүд болдог бол энэ удаад хоёр дахь нь мөн үндсэн хэмжээний хүчтэй байсан.
Голомт газрын гадаргад харьцангуй ойр, хүн ам шигүү суурьшсан бүсийн ойролцоо болсон, хоёр дахь хүчтэй чичиргээ эхний доргилтоор суларсан барилгуудад нэмэлт ачаалал өгсөн зэрэг шалтгаанаар хохирол их үзсэн аж. Эрдэмтэд одоо энэ үйл явдлыг маш анхааралтай судалж байгаа бөгөөд энэ нь сүүлийн хэдэн арван жилийн хамгийн онцгой "давхар газар хөдлөлтийн" жишээнүүдийн нэг гэж үзэж байна.