Хорин жилийн өмнө хилээр хууль бусаар гаргаж, гадаад улсад худалдан борлуулсан үлэг гүрвэлийн ясыг эргүүлэн авчиржээ. Тус олдворуудыг хүлээн авах ажиллагаа өнөөдөр Байгалийн шинжлэх ухааны үндэсний музейд болсон юм.  Цагдаагийн ерөнхий газраас өгсөн мэдээллээр, манай улсын найман иргэн Өмнөговь аймгийн нутаг дэвсгэрт хууль бусаар малтлага явуулж, үлэг гүрвэлийн багц ясыг олсон байна. Тэд 2006 онд хуурамч бичиг баримт бүрдүүлэн, гаальд худал мэдүүлж улсын хилээр гаргажээ.
Уг гэмт хэрэгт соёлын өвийг хууль бусаар олж авах, хадгалах, худалдах болон улсын хилээр барааг хууль бусаар нэвтрүүлэх зүйл ангиар эрүүгийн хэрэг үүсгэн шалгаж байгаа аж. Франц улсад явагдсан мөрдөн шалгах ажиллагаа болон шүүх хурлын үр дүнд Тиранозавр Батаарын бүтэн хэлхээ яс болон бусад олдворуудыг хураан авчээ. Энэхүү ажиллагааны хүрээнд гадаадын гурван улсын дөрвөн иргэнийг шалгасан байна.
Соёл, спорт, аялал жуулчлал, залуучуудын яамны Соёлын өвийн хэлтсийн дарга Б.Даваацэрэн "Энэхүү олдворыг эх орондоо авчрахын тулд 13 жилийн турш идэвхтэй хөөцөлдсөний эцэст ийнхүү үр дүнд хүрлээ. Олон улсын конвенцууд болон холбогдох байгууллагуудын хамтын ажиллагаа энэ ажилд шийдвэрлэх үүрэг гүйцэтгэлээ" хэмээн онцлов.

Байгалийн шинжлэх ухааны үндэсний музейн захирлын албан үүргийг түр орлон гүйцэтгэгч Н.Манчук “15 хайрцаг бүхий 38 ширхэг олдвор ирсэн. Ихэнх нь хожуу цэрдийн үе буюу 66-100 сая жилийн өмнөх Монголын говиос олдсон үлэг гүрвэлийн яснууд юм. Өмнө нь олдсон яснуудтай нийлүүлснээр бүрэн хэлхээ болж палеонтологийн хувьд маш өндөр үнэ цэнтэй юм” гэлээ.
Уг түүхийн үнэт олдворуудыг МИАТ ТӨХК-аар тээвэрлэн авчирсан бөгөөд Палеонтологийн хүрээлэнтэй хамтран нарийвчилсан судалгаа хийсний дараа олон нийтэд үзэсгэлэн хэлбэрээр толилуулахаар төлөвлөж байна.